Daghan na kaayo ganahan mag-nursing

Sa among section sa klase, mostly mga second-coursers mi tanan. Ug diverse kaayo among mga backgrounds. Si AS usa ka artist. Nigradute siya gikan sa UP. Full-time painter siya sa wala pa siya mu-enroll og nursing. Ug before pa jud ana, nimajor siya og Philosophy og English sa usa ka inila nga seminary diri sa ato sa Cebu. Si JG electrical engineer, si JA former medrep, si JY Psychology graduate, pareha nako. Pareha ra mi ug iskwelahan gigikanan, sa CDC (karon CDU na). Si Kuya A og Ate MP engineer pud. Si RA former seminarian pud. Si E former seaman. Naa poy nakatrabaho na og caregiving sa gawas sa amoa, pero nakalimut ko sa iya pangalan.

Sa uban sections, daghan pud kaayo mga second-coursers. Actually daghan jud kaayo second-coursers diri sa amo sa UV. Naay uban nga edad-edaran na. Naay uban mga mama na gali, aduna nay mga anak. Bilib ko nila kay bisan sa kalisud sa ilang schedule (tungod kay divided ilang time sa ilang studies og sa ilang family, o trabaho pa gani), kaya gihapon nila mu-eskwela. Nakuyawan gani ko sa wala pako mu-enrol og nursing, kay abi nako isa ko sa mga pinakatiguwang nga estudyante og nursing sa UV. Dili diay. Naa pa diay daghan nga mas "senior" pa nako. Haha.

Ug mao na ang rasun tingali nganong sa niaging board exams ang UV College of Nursing mao ika-3rd ug pinakadaghan ug pasar sa Cebu. First ang Cebu Doctors' University og second ang Velez og Cebu Normal University.

Karong second semester puhon, ablihan na ang bag-o nga building sa College of Nursing, tapad sa among building karon. It is almost the same size, so mamultiply jud tingali kaduha ang population sa nursing students sa UV. Karon, sa akong nahibaw-an, murag mga 3,000 plus nami kabuok nga nursing students. So next semester 6,000 plus na tingali mi! Maghuot na jud mi sa campus. Lipay kaayo si Noy Gullas.

Daghan na kaayo kog kaila sa una nga nar-nursing na pud karon. Katong niaging 2 o 3 ka semana natagbuan pa nako among silingan nga nagtrabaho sa isa ka insurance company didto sa among iskwelahan. Ganahan pud daw siya mag-nursing. Pero mag-trabaho lang gihapon siya samtang magtuon. Lisud na. Dugay siya mahuman, ug lisud kaayo ang schedule niya, labi na kung mu-duty na siya sa hospital. Early this year pud, nakita nako akong teacher sa psycholgy sa SM. Ni-resign na to siya sa iyang trabaho pagka-teacher, unya balita namo sa una mularga daw to siya sa Australia. Pero pagkita namo, nakuratan na lang ko pag-ingon niya nga nag-nursing pud diay siya! Na-shock ko, dili ko katuo, kay maayo to siya nga maestra. Intelligent kaayo. She could have pursued her teaching career further. Naa pud koy isa ka tita nga nag-nursing pud. Dentist siya, pero iyang family tua na didto sa Canada. Gipaapas na siya sa iya family didto, pero lisud man igawas kung dentist ka. So nag-nursing na lang daw siya kay sayun ra daw isulod og Canada isip usa ka nurse.

Makagukol jud ang atong kahimtang karon. Murag daghan na jud kaayong gusto mugawas sa nasud.

Katong miaging Huwebes, nagmisa sa among iskwelahan. Gwapo kaayo ang wali sa pari. Adunay kalabutan ang iyang mensahe sa among mga nursing students og nurse professionals. Gi-encourage mi niya nga tan-awn ang among motivation sa pag-tuon og nursing. Nagtuon ba lang mi para lang sa kwarta, sa sweldo namo puhon inig o kung makatrabaho nami sa gawas? O nagtuon ba jud mi og nursing kay ganahan jud mi mag-nurse og tawo, maghatag og care, magpakita og compassion sa mga nanginahanglan, sama sa gusto sa Ginoo nga buhaton namo? Niingon si father, kung ang rasun nganong nagtuon mi mao lamang aron makapasar lang mi sa among mga subjects, para mahimong nurses, og para maka-sweldo og dako (kung tua na mi sa gawas), mahimo jud nga lisud ang among studies. Pero kung among i-offer sa Ginoo ang among studies para sa Iyang "greater glory" og para sa Iyang mga plano, then mas-meaningful ang among pagka-istudyante sa nursing. Naa nay "joy" ang among pag-hatag og care. Niingon pud si father nga dili tungod kay nag-nursing uniform naka, naa na kay stethoscope diha sa imong abaga og nagbitbit naka og BP apparatus, tinuod jud ka nga nurse. Sa akong pagsabot sa iyang gisulti, ang pagkanurse wala lang sa outward appearance, kun dili naa pud especially sa imong kasingkasing ug sa imong mga lihok.

Ganahan ko nga i-examine nako akong motives nganong nag-nursing ko. Ganahan pud ko nga i-offer nako ni Lord akong studies. Sa tinuod lang, lisud jud ang nursing. Daghan kaayo tun-anan. And then sometimes pa ma-discourage ko kay dili ko ka-relate usahay sa uban nako classmates.

Wala ko kabalo kung I really have what it takes to be a nurse. I hope so.